Чеченистон раҳбари Рамзан Қодировнинг ўғли Адам Қодиров 1-даражали “Ислом динига хизматлари учун” ордени билан тақдирланди. Бу ҳақда Чеченистон Миллий сиёсат, ташқи алоқалар, матбуот ва ахборот вазири Аҳмад Дудаев маълум қилди.
“Чеченистон Республикаси раҳбарини қўриқлаш бошқармаси бошлиғи, муҳтарам биродаримиз Адам Рамзанович Қодировни 1-даражали “Ислом динига хизматлари учун” ордени билан тақдирлангани билан чин қалбимдан табриклайман. Мукофот Чеченистон Республикаси муфтийси Салоҳ-Ҳожи Межиев томонидан Шимолий Кавказ минтақаларининг барча муфтийлари иштирокида топширилди”, деб ёзган Дудаев.
Унинг сўзларига кўра, мукофот бугун, 15 ноябрь куни Грознийда очилган халқаро илмий-амалий анжуман чоғида топширилган.
“Орден Ислом динини мустаҳкамлаш ва унинг қадриятларини ҳимоя қилишга қўшган катта шахсий ҳиссаси учун берилади”, дея қўшимча қилган Дудаев.
