Сирдарё вилоятида яшовчи фуқаро Сибир ярасини (куйдирги) юқтириб олгани аниқланди. Вилоят СЭС бошқармаси касаллик одамдан одамга юқмаслигини айтиб, ҳозирда эпидемиологик вазият барқарорлиги ва хавотирга ўрин йўқлигига ишонтирмоқда.L

Сирдарё вилояти Санитария-эпидемиологик осойишталик ва жамоат саломатлиги бошқармаси ижтимоий тармоқларда Сардоба тумани Ховотоғ қишлоғининг «Зомин» маҳалласида аниқланган А-22 касаллиги туфайли 10 кунлик карантин эълон қилингани ҳақидаги хабарларга изоҳ берди.

Бошқарма маҳаллада яшовчи фуқаролардан бирида А-22 аниқланганини тасдиқлади. Касалликларнинг халқаро таснифи ((КХТ-10) бўйича А-22 бу сибир яраси (куйдирги) ҳисобланади.

Мазкур касаллик одамдан одамга юқмайди, фақат касалланган молларни сўйиш пайтида ва хом гўшт билан алоқада бўлган одамга юқади, дея таъкидлади СЭС вилоят бошқармаси.

Шунга кўра, карантин фақат йирик ва майда шохли қорамолларга нисбатан қўлланилади, дейилади баёнотда.

Бугунги кунга келиб ветеринария шифокорлари «Зомин»маҳалласи ҳудудидаги барча йирик ва майда қорамолларни ушбу касалликка қарши эмлашган.

Бошқарма ҳозирда эпидемиологик вазият барқарор ва хавотирга ўрин йўқ, деб ишонтирмоқда.