Иккинчи жаҳон уруши пайтида Германия нацистлари томонидан ўғирланган ва йўқолган деб ҳисобланган рококо даврига мансуб сурат Аргентинада топилди.
Италиялик рассом Витторе Гисландининг «Хоним портрети» асари сўнгги 80 йил давомида йўқолган деб ҳисобланган. Сурат нидерландиялик журналистлар ҳамда амстердамлик яҳудий арт-дилер Жак Гудстиккернинг меросхўрлари томонидан қидирилаётган эди, асар урушдан олдин унга тегишли бўлган.
Шу йил август ойи охирида Нидерландиянинг Algemeen Dagblad нашри журналистлари Мардел-Плата (Аргентина) шаҳрида яшовчи Патрисия Кадгиннинг уйидан олинган фотосуратлар орасида «Хоним портрети»ни топишди. Кадгин — Аргентинага қочиб кетган собиқ эсэсчи Генрих Терингнинг ёрдамчиси Фридрих Кадгиннинг қизи. Фридрих Кадгин 1979 йилда вафот этган ва уйини қизига мерос қилиб қолдирган.
3 сентябр куни Аргентина прокуратураси «Хоним портрети» мусодара қилинганини маълум қилди. Патрисия Кадгин ва унинг турмуш ўртоғи суратни ўз вакили орқали прокуратурага топширган. Шу билан бирга, уларнинг ўзлари 72 соатга уй қамоғига олинган ва суратни қидириш бўйича терговга тўсқинлик қилганликда айбланиб, сўроқ қилинади.
