Жиззахда ВВЭР-1000 реакторлари билан катта АЭС ҳамда алоҳида кичик станция лойиҳалари ишга туширилади.
Ўзбекистон ҳудудида Россия технологияси асосида бир вақтнинг ўзида катта ва кичик қувватдаги икки атом электр станцияси қурилиши мумкин. Бу ҳақда Москвадаги Ўзбекистон элчихонасида ўтказилган қабулда Россия ташқи ишлар вазири ўринбосари Сергей Рябков маълум қилди.
Унга кўра, бу лойиҳа Марказий Осиёдаги биринчи шов-шувли дастур сифатида қайд этилмоқда. «Агар муваффақиятли амалга оширилса, бу Ўзбекистон учун янги технологик сакраш бўлади», — деди Рябков. Лойиҳа энергетика соҳасидаги икки томонлама ҳамкорликда янги босқични бошлайди.
Ўзбекистон ва Россия 2018 йилда АЭС қурилиши бўйича келишув имзолаганди. Унга кўра, икки ВВЭР-1200 реакторли станция қурилиши керак эди. 2024 йил май ойида келишув қайта кўриб чиқилиб, дастлаб кичик АЭСдан бошлашга қарор қилинди. Унда олти реактордан иборат лойиҳа белгиланган, кейинчалик бу иккига қисқартирилди.
Катта АЭС қурилиши масаласи 2025 йил март ойида «Росатом» ва «Ўзатoм» музокараларида яна кўтарилди. Июнда томонлар катта станция бўйича янги келишувни имзолади. Унга кўра, ҳар бири 1 GW қувватга эга иккита ВВЭР-1000 энергоблоки қурилади. Кейинчалик станцияни тўрт блокқача кенгайтириш мумкин бўлади.
Лойиҳани амалга ошириш учун қўшма ишчи гуруҳ ташкил этилган бўлиб, у техник параметрлар, молиявий харажатлар ва якуний қарор ишлаб чиқиши керак. Бош пудратчи — «Росатом»нинг инжиниринг бўлими бўлган «Атомстройэкспорт», шунингдек, маҳаллий компаниялар ҳам жалб этилади.
