Ўзбекистоннинг Қоҳирадаги элчиси Мансурбек Қиличев Миср Ғазодаги урушни тўхтатиб туриш ва қамалда қолган ғазоликларга гуманитар ёрдам етказишда муҳим роль ўйнаганини таъкидлади. Бу ҳақда элчи MENA агентлигига берган интервюсида маълум қилган.
Қиличев 22 январь, душанба куни берган интервюсида Ўзбекистон Ғазода содир бўлаётган инқирозни ҳар томонлама ҳал этиш тарафдори эканини айтган ва бу ечим 1967 йилдан олдинги чегараларда пойтахти Шарқий Қуддус бўлган мустақил Фаластин давлатининг барпо этилиши билан бўлишини қўшимча қилган.
“Бу тегишли халқаро қонунийлик резолюцияларига тўлиқ мос келади”, деган дипломат.
Қиличевнинг айтишича, Ўзбекистон Фаластин халқи ва мустақил давлатини барпо этиш ҳуқуқини тўлиқ қўллаб-қувватлайди.
Шунингдек, Қиличев Ўзбекистон Президенти Шавкат Мирзиёев Бирлашган Миллатлар Ташкилотининг Яқин Шарқ агентлиги (UNRWA)га Ғазодаги фаолияти учун 1,5 миллион доллар ажратганини билдирган.
Маълумот учун, эртага 23 январь куни Миср ва Ўзбекистон дипломатик муносабатлар ўрнатилганига 32 йил тўлади.
“Миср Ўзбекистоннинг Яқин Шарқ ва Африкадаги муҳим ҳамкори”, деган Қиличев.
Унинг қўшимча қилишича, Тошкент ва Қоҳира ўзаро манфаатларга асосланган яқин сиёсий мулоқот ва иқтисодий ҳамкорликни давом эттирмоқда. Мирзиёевнинг 2023 йил февраль ойида Мисрга қилган ташрифи икки давлат ўртасидаги ҳамкорлик даражасини оширишга катта ҳисса қўшган.
“Бу тарихий ташриф бўлиб, икки томонлама 10 та битим имзолади, жумладан, иккитаси туризм ва фармацевтика саноатини ривожлантиришга доир”, дея сўзида давом этган дипломат.
У, шунингдек, қишлоқ хўжалиги соҳасида қўшма корхоналар, шунингдек, ўтган йили Ўзбекистон Президентининг Мисрга ташрифи арафасида ўтказилган ишбилармонлар форумида имзоланган қиймати 1,6 миллиард долларга яқин инвестиция лойиҳаларига тўхталиб ўтган.
Дипломат ўша йилнинг декабрь ойида Ўзбекистон Олий Мажлиси Сенати қўмитаси раиси Малика Қодирхонова Миср Сенати котиби ўринбосари Фиб Фавзи билан икки давлат ўртасидаги парламент ҳамкорлигини ривожлантириш масалалари юзасидан музокаралар ўтказганини алоҳида урғулаган.
Элчининг маълум қилишича, айни пайтда Ўзбекистон ва Миср 2024 йилнинг биринчи ярмида Тошкентда ўтказилиши режалаштирилган қўшма ҳукумат қўмитасининг 7-йиғилишида имзоланиши мўлжалланган 11 та ҳамкорлик ҳужжати устида ишламоқда.
Мисрнинг “Nile Sugar Co” компанияси Жиззах вилоятида қанд лавлаги етиштириш учун инвестиция лойиҳасини бошлаб юборгани, ҳосил 50 минг гектардан ортиқ майдонга экилиши кўзда тутилаётгани ва 100 гектар майдонда йилига 200 минг тонна шакар заводи ташкил этилиши мўлжалланаётгани ҳақида элчи интервюси чоғи айтиб ўтди.
“Бундан ташқари, “E2 Metals Limited” Ўзбекистонда фойдали қазилмаларни қидириш лойиҳаси устида ишламоқда”, деган дипломат.
Икки давлат ўртасидаги савдо айирбошлаш миқдори ҳақидаги саволга Қиличев, 2023 йилда бу кўрсаткич 60 фоизга ошиб, ўтган йилги 30 миллион доллардан 50 миллион долларга етганини айтди.
«Ўтган йили араб давлатига 40 мингга яқин ўзбекистонлик ташриф буюрган. Ўзбекистонга эса 2 мингга яқин мисрлик сайёҳ ташриф буюрган. Айни пайтда Ўзбекистон кўпроқ сайёҳларни жалб қилиш учун Мисрнинг ноу-хау усулидан фойдаланишга интилмоқда. Тошкент ва Қоҳира 2023-2025 йилларга мўлжалланган туризм соҳасидаги ҳамкорликни ривожлантириш, саёҳат гидлари ва синхрон таржимонларни тайёрлаш бўйича режа имзолади. Бу режа Ўзбекистон ва Мисрнинг сайёҳлик жойларига саёҳат қилишни тарғиб қилишга қаратилган” деган Қиличев.
