Ўзбекистонда никоҳ ёши эркаклар учун ҳам, аёллар учун ҳам бир хил ўн саккиз ёш этиб белгиланган. Қонунда фақат неча ёшдан бошлаб никоҳга кириш мумкинлиги белгиланган, бироқ неча ёшдан бошлаб никоҳ тузиш мумкин эмаслиги белгиланмаган, шунга кўра никоҳдан ўтувчиларнинг ёшларидаги катта фарқ никоҳ тузишга тўсқинлик қилмайди.
Никоҳдан ўтувчиэркак ва аёллар физиологик етилиб, маънавий ва жисмоний жиҳатдан ўсиб, ота-она бўлиш қобилиятига эга бўлганда никоҳдан ўтишса мақсадга мувофиқ бўлади.
Фуқаролик кодексининг 22-моддасига кўра вояга етгунга қадар қонуний асосда никоҳдан ўтган фуқаро никоҳдан ўтган вақтдан эътиборан тўла ҳажмда муомала лаёқатига эга бўлади.
Қонунда белгиланган никоҳ ёшига риоя қилмасдан ғайриқонуний равишда никоҳ муносабатида бўлиш бир қатор ҳуқуқий оқибатларни вужудга келтириши мумкин. Бундай никоҳ ҳақиқий эмас деб топилиб, тегишли шахсий ва мулкий ҳуқуқий оқибатларни келтириб чиқаради. Бу ҳолат, хаттоки жиноий оқибатларга ҳам олиб бориши мумкин.
Масалан, Жиноят кодексининг 125-1-моддасига биноан, никоҳ ёшига етмаган шахс билан ҳақиқатда никоҳ муносабатларига киришиш, шундай қилмишлар учун маъмурий жазо қўлланилгандан кейин содир этилган бўлса, жиноий жавобгарлик белгиланган.
Агарда, узрли сабаблар бўлганида, никоҳга киришни хоҳловчиларнинг илтимосига кўра никоҳ давлат рўйхатидан ўтказиладиган жойдаги туман, шаҳар ҳокими никоҳ ёшини кўпи билан бир йилга камайтириши мумкин.
Оила қонунчилигига кўра, никоҳдан ўтгандан сўнг никоҳда қанча муддатда бўлиши белгиланмаган.
Ш.Элиев, Сурхондарё вилоят судининг фуқаролик ишлари бўйича судьяси
