Уругвая, Колумбия ва Парагвай терма жамоалари ЖЧ-2026 саралашининг 17‑тури якунига кўра, мундиалга йўлланма олди.
Шу тариқа Жанубий Америкадан жаҳон чемпионатига тўғридан-тўғри олтита йўлланманинг барча эгалари маълум бўлди. Булар: Аргентина (38 очко), Бразилия (28 очко), Уругвай (27 очко), Эквадор (26 очко), Колумбия (25 очко) ва Парагвай (25 очко).
Сўнгги турда Венесуэла ва Боливия плей-оффда ўйнаш имконини берувчи еттинчи ўрин учун курашади. Ҳозир еттинчи ўринда Венесуэла (18 очко) кетмоқда, боливияликларнинг очколари биттага кам.
18 турда Венесуэла ўз майдонида Колумбияни, Боливия эса Бразилияни қабул қилади. Ҳар икки ўйин 9 сентябрда бўлиб ўтади.
Шу тариқа 2026 йилги мундиал иштирокчилари сони 16 тага етди: АҚШ, Мексика, Канада, Австралия, Эрон, Япония, Иордания, Жанубий Корея, Ўзбекистон, Аргентина, Бразилия, Эквадор, Янги Зеландия, Уругвай, Колумбия, Парагвай.
