Шавкат Мирзиёев 17 октябрь куни Пекинга амалий ташриф доирасида ўзига ажратилган қароргоҳда Амер International индустриал-саноат холдинги раиси Ван Венинни қабул қилди.

Президент матбуот хизматининг маълум қилишича, Хитойнинг етакчи конгломератларидан бири бўлган “Амер International” юксак технологиялар, электроника, яримўтказгичлар саноати, кончилик ва қайта ишлаш тармоқларидаги лойиҳалар билан шуғулланади. Компания “Фортуне 500” глобал рейтингига кирган. Хитойда ва унинг ташқарисида умумий қиймати 60 миллиард доллардан зиёд бўлган лойиҳаларни амалга оширмоқда.

Ван Венин Ўзбекистонда олиб борилаётган ислоҳотлар дастури хорижий, шу жумладан Хитой компаниялари учун қулай шароит яратаётгани ва кенг имкониятлар очаётганини таъкидлади. Компания Ўзбекистонга Марказий Осиё минтақасидаги бизнесининг бош йўналиши сифатида қараётгани қайд этилди.

Мисни чуқур қайта ишлаш ва ундан юқори қўшилган қийматли инновасион ва харидоргир маҳсулотлар, шу жумладан электротехника, электромобиллар учун аккумулятор батареялари, микроэлектроника ва яримўтказгичлар ишлаб чиқариш бўйича истиқболли лойиҳалар муҳокама қилинди.

Амер International компанияси раиси Хорижий инвесторлар кенгаши фаолиятида иштирок этиши, Ўзбекистонда минтақавий офис очиш ҳамда қўшма инновасион лойиҳаларни тезлаштириш бўйича йўл харитасини қабул қилиш юзасидан келишувга эришилди.

Эслатиб ўтамиз, Шавкат Мирзиёев амалий ташриф билан Пекинда 17—18 октябрь кунлари бўлади. Ташриф давомида Си Цзиньпин ва Хитой Халқ сиёсий маслаҳат кенгаши раиси Ван Хунин билан музокаралар, бошқа икки томонлама учрашувлар ўтказиши режалаштирган. Президент “Бир макон, бир йўл” халқаро форумининг очилишида иштирок этади ва ялпи сессиясида нутқ сўзлайди.