28 феврал куни старт олиши кутилаётган 2020 йилги Суперлиганинг янги мавсуми олдидан мусобақа регламентида ўзгариш киритилади. Бу ҳақида ПФЛ вакили Диёр Имомхўжаев телеграм саҳифасида хабар берди.
“Мусобақаларни ўтказиш регламентининг Суперлига учун аталган бўлимида 1997 йил ва ундан кейин туғилган икки нафар футболчини ўйин қайдномасига киритиш ва улардан бирини минимум 45 дақиқа ўйнатиш банди бор эди. 2020 йилги регламентда мазкур банд ўз кучини йўқотди” – дея ёзмоқда ПФЛ расмийси.
Маълумот учун, Суперлиганинг 2020 йилги мавсуми 28 феврал кунидан старт олиши маълум қилинган бўлса-да, ПФЛ ҳозирча турнирга қуръа ташлаш маросими қачон ўтказилишини эълон қилгани йўқ.
Эслатиб ўтамиз, 2020 йилги Суперлигада воҳамизнинг “Сурхон” клуби ҳам иштирок этади. Ҳозирда клуб футболчилари мавсумга тайёргарлик ишларини олиб боришмоқда.
