Нимани қачон амалга ошириш кераклигини билиш ҳамма нарсани ҳал қилади. Барча бажарилиши керак бўлган ишларнинг айнан бажарилиши лозим бўлган вақтини билиш инсонни юксакка, яъни мукаммаллик сари етаклайди. Шуни ҳисобга олган ҳолда, сизга жаҳон тиббиётчи олимларининг инсон доимо бажарадиган ҳаётий ҳаракатларининг энг мақбул вақтлари ҳақида маълумот бермоқчимиз. Зероки, улардан айримлари сиз учун қизиқарли маълумот бўлса, айримлари саломатлигингизнинг яхши томонга ўзгаришига туртки бериши мумкин.
Туғилиш. Дунё акушерларининг тасдиқлашларича, чақалоқларнинг кўпчилиги тунги соат 12 дан 4 гача бўлган вақтда туғилар экан.
Қон босими. Тунги соат 4 билан 5 оралиғида киши қон томирларида энг паст босим бўларкан. Шунинг учун ҳам бу вақтда уйқудан уйғониш қийин кечади.
Ювиниш. Эрталабки 8 да совуқ сувда чўмилиш жуда фойдалидир. Чунки шу пайтда организмда ҳимоя кучлари фаоллашган бўлади.
Овқатланиш. Эрталабки 8 даги нонушта қоматингизга ҳеч қандай салбий таъсир кўрсатмайди, негаки, бу пайтда углеводлар ёғга эмас, балки энергияга айланади. Лекин, кечқурунги 8 да тановул қилинган овқат эса қоматингизни бузиши мумкин, чунки у жисмингизда ёғга айланади.
Даволаниш. Тиббий муолажалар учун, яъни укол ва дори-дармон қабул килиш учун энг яхши вақт эрталабки соат 8-9 лар оралиғидир. Бу пайтда тери ўта сезгир бўлади. Бироқ, агар эҳтиёж сезилса, тиш дўхтирига яхшиси тушдан кейин учрашганингиз маъқул. Негаки, шу пайтда организм кўпам «жиззакилик» қилавермайди.
Ижод учун қулай вақт эрталабки соат 10 ва туш пайти. Сабаби – мия тиниқ ва фаоллашган бўлади.
Жисмоний ҳаракат учун эса маъқул соат 13 дир. Чунки шу дамда мускулларнинг таранглиги ва қуввати ошади.
Ҳазм. Соат 13 да ошқозон жуда кўп суюқлик ишлаб чиқаради. Ҳатто бу пайтда овқатланишга одатланмасангиз ҳам. Шунинг учун соат кундузги 1 бўлмасиданоқ тушлик қилишга ўрганинг.
Уйқу. Америкалик мутахассисларнинг айтишларича, энг ширин уйқу кундузги 14 дагисидир. Бу пайтда уйқу организмга тунги уйқудан кўра кўпроқ хуш ёқади.
Соч ва тирноқлар. Соат 16 ва 18 лар атрофида соч ва тирноқларнинг ўсиши тезлашади.
Иштаҳа ва мусиқа. Соат 17 да организм учун энг «буюк» иштаҳа қўзғалса, 19 да эса мусиқа тинглаш учун энг кўтаринки руҳ пайдо бўлади.
Ичкилик. Жигар ўз фаолияти давомида соат 18 ва 20 лар оралиғида спиртли ичимликлар кучини осон «кесади», аммо тун ярмидан кейин ичилган ичкилик эса организмни «кўтариб» ташлайди (алкогол маҳсулотларини истеъмол қилиш зарарли ва ҳаёт учун хавфли).
Чой. Соат 18 дан 20 гача бўлган вақт оралиғида ичилган чой организмга жуда яхши сингади.
Суртмалар. Юзга суртма суриш учун энг қулай вақт бу 18 билан 20 оралиғидир. Чунки айнан шу пайтда тери суртмалар учун ўта сезгир бўлади.
Мулоқот. Дўстона мулоқот учун энг яхши вақт соат 18 ва 20 лар оралиғида. Одамзотда айнан шу пайтда негадир ўзини ёлғиз ҳис этиш кайфияти пайдо бўлади.
Интернет материаллари асосида Б.Абдураззоқов тайёрлади
