Uncategorized

Самарқанддаги янги қурилишларни ким қурмоқда?

2022 йилда Шанхай ҳамкорлик ташкилоти давлат раҳбарларининг навбатдаги саммити Самарқандда ўтиши кутилмоқда. Шу сабабли ва умуман, Самарқандда жуда катта қурилиш ишлари кетаяпти. Аксарият йирик қурилиш-реконструкция ишлари Enter Engineering, «ERIELL» компаниялар гуруҳи бошқаруви раиси Бахтиёр Фазилов ва унинг яқинларига (Mirankul Group) тааллуқли компаниялар томонидан бажарилаётганини кўриш мумкин. Ўрганишларимиз бу ишларнинг қонуний ёки ноқонунийлиги ҳақида эмас, шунчаки очиқ маълумотларни тақдим этиш ҳисобланади, деб ёзмоқда Davletov.uz телеграмм каналида.

  1. Самарқанд халқаро аэропортини реконструкция қилиш. Лойиҳа қиймати 238,2 млрд сўмга баҳоланган. Реклама материалларига кўра, мазкур объектни реконструкция қилиш билан Enter Engineering компанияси шуғулланмоқда. Дарвоқе, ҳукумат қарори билан Самарқанд аэропорти давлат-хусусий шериклик тамойили асосида 20 йилга Air Marakanda компаниясига бошқарувга берилган. Тендерсиз. Gazeta.uz сайтининг ёзишича, компания 80 млн доллар инвестиция киритиш мажбуриятини олган.

Air Marakanda компаниясининг ягона таъсисчиси офшорда — Кипрда рўйхатдан ўтган Drupola Holdings Limited компанияси ҳисобланади. Мазкур компания жойлашган юридик манзилда Ferkensco Management Limited ва Eriell Holding Company Limited компаниялари ҳам жойлашган. «Самарқандкимё»нинг 100% улуши ўз вақтида Ferkensco компаниясига «ноль» қийматда сотилган эди.

  1. Silk Road сайёҳлик марказини барпо этиш. 212 гектарлик майдонда барпо этилган ушбу лойиҳанинг қиймати 353 млн АҚШ доллари бўлиб, буюртмачи Samarkand Touristic Centre компанияси ҳисобланади. Мазкур компаниянинг 60% улуши Бахтиёр Шухратович Фазиловга тааллуқли. Пудратчи ҳам буюртмачига алоқадор бўлган Enter Engineering компаниясидир.
  2. Имом Бухорий зиёратгоҳининг янги мажмуаси қурилиши. Лойиҳа қиймати номаълум. Пудратчи Enter Engineering компаниялар гуруҳи бўлиб, 7 та меҳмонхона, 3 та автотурургоҳ ва автобекат, супермаркет, бозорча барпо этилади. Шунингдек, ошхоналар, ҳунармандчилик буюмлари растаси, ҳаммом, таҳоратхона, кушхона қурилиши режалаштирилган.
  3. Самарқанд шаҳрида 168 ўринли мактаб қурилиши. Лойиҳа қиймати 74 млрд сўм. Давлат харидлари портали маълумотларига кўра, мазкур объектнинг пудратчиси Innocraft МЧЖ ҳисобланади. Innocraft 2019 йил июнь ойида ташкил этилган бўлиб, асосий улуши — 99,80% улуш Mirankul Group хусусий корхонасига, Mirankul Group эса тўлиғича Усманов Отабек Алимжоновичга тегишли. Усманов Отабек ва Бахтиёр Фазилов Mironkul Stroy Servis, Mirankul Construction Materials ltd, Mironkul Group Tower, Mironkul Meva (тугатилган), Paradise Gardens (тугатилган), Surxon Golden Fruits (тугатилган) каби компанияларда бевосита ёки билвосита улушдорлик қилган. Innocraft МЧЖ бундан ташқари қатор ижтимоий объектларни қуриш билан шуғулланмоқда.
  4. Интернетдаги маълумотларга кўра, Сингапурда рўйхатда ўтган Enter Engineering компаниясининг 51% улушига Бахтиёр Фазилов Кипрда рўйхатдан ўтган Klintworth Investments компанияси орқали эгалик қилади. 19%и эса Россиянинг Газпромбанкига тегишли. Компания Инқирозга қарши курашиш жамғармаси маблағлари ҳисобидан Зангиота юқумли касалликлар шифохонасини ва бошқа объектларни ҳам қурган. Бахтиёр Фазилов, шунингдек, Wind Rose МЧЖ орқали Humo Arena савдо белгисига, Самарқандда Family Park компаниясига ҳам эгалик қилади. 2019 йилда «Фидокорона хизматлари учун» ордени билан тақдирланган.

LEAVE A RESPONSE

Email manzilingiz chop etilmaydi. Majburiy bandlar * bilan belgilangan