Бугун бир гуруҳ Франция ҳукумати аъзолари ва мамлакат спорт ҳаётида ўз ўрнига эга бўлганлар каратэ спортини 2024 йилги олимпия ўйинлари дастурига киритиш ташаббуси билан чиқди.

Маълумки, каратэ Япония давлати ва Халқаро каратэ федерацияси илтимосига биноан “Токио-2020” дастурида бир марталик иштироки учун рухсат берилганди. XXXIII олимпия ўйинларининг тасдиқланган спорт турлари сафига эса каратэ киритилмаганди.

Айтиш лозимки, ушбу спорт турининг халқаро майдонда ривож топишида Франция давлатининг ўрни беқиёс. Айнан ушбу мамлакат каратэни халқаро спорт тури сифатида биринчилардан бўлиб эътироф этган ва дунёдаги илк халқаро каратэ тўгаракларини ташкил қилганди. Европадаги биринчи каратэ турнирлари ҳам Францияда ўтказилган эди. Шунинг учун ҳам улар каратэни Париж олимпиадасида кўришни истамоқда.  

Шу мақсадда, Франция парламентининг 115 нафар депутати “Париж-2024” ташкилий қўмитасига каратэни олимпия ўйинлари дастурига киритиш бўйича мурожаат хатини йўллади, дея хабар тақатди franceinfo сайти.

Бу, ҳозирча ният. Ниятнинг рўёби эса Халқаро олимпия қўмитаси ҳайъатига боғлиқ. Аммо 2024 йилги ёзги олимпия ўйинлари Францияда ўтказилаётганлигини инобатга олсак, каратэ олимп тизимига киритилиши учун имкониятлар етарли. Лекин тасдиқланган “Париж-2024” дастурини ўзгартириб бўлармикин? Ўйинларни ўтказиш ташкилий қўмитаси французлар эканлиги назарда тутилса, орзулар ҳақиқатга айланиши эҳтимолдан йироқ эмасдек кўринади. Буни эса вақт кўрсатади.