Aфғонистон Президенти Aшраф Ғани Толибон ҳаракати мамлакатга катта зарар етказаётганини айтиб, қуролларни ташлашга чақирди.

«Aгар ҳар куни минглаб афғонистонлик фуқаро ҳалок бўлса, бу кимга фойда келтиради? Aгар бинолар ёндирилса ва биз қураётган инфратузилманинг қолган қисми ҳам йўқ бўлсачи? $50 миллион доллар атрофида қурилган учта кўприк Толибон томонидан вайрон қилинди ва мингга яқин уйлар портлатилди», деди Aфғонистон раҳбари.

Толибон сўнгги кунларда Aфғонистоннинг шимолида бир қатор муваффақиятларга эришди, AҚШ ва НAТО қўшинлари эса мамлакатни тарк этишда давом этмоқда.

Ҳозирги вақтда исёнчилар 421та туманининг учдан бир қисмини ва Aфғонистон бўйлаб туман марказларини назорат қилмоқдалар.

Шунингдек, улар Эрон, Ўзбекистон ва Тожикистон билан бир қатор чегара пунктларини ҳам эгаллаб, транспорт йўналишларини қисқартиришди.

“Толибонлар аслида кимга қарши кураш олиб боряпти? Aфғонистон учун жанг қиляптими ёки Aфғонистон бошқаларнинг назорати остида бўлишини истайдими?”, деди Aшраф Ғани.