Инсон, миллат ва халқ тарихий хотира туйғуси билан барҳаёт. Хотира – кечаги ўтмишни, аждодлар ўгити, миллий меросимизни англатиб турувчи – муқаддас китоб. Қадр – инсонни юксакликка кўтаради, унинг фаолиятига, орзу-интилишлари, мақсад-маслакларига олижаноблик бағишлайди.

Бу йил Иккинчи жаҳон урушида қозонилган Ғалабанинг 75 йиллиги. 1941-1945. Бу рақамлар тарих зарварақларида инсоният бошидан кечирган энг оғир, қонли, қора кунлар сифатида из қолдирган.

1939 йил 1 сентябрдан 1945 йил 2 сентябргача – олти йилу бир кун давом этган Иккинчи жаҳон уруши ўша пайтда сайёрамизда мавжуд бўлган 73 та давлатдан 61 тасини қамраб олган, дунёнинг 80 фоиз аҳолисининг ҳаёт тарзини зимистонга айлантирган.

Иккинчи жаҳон урушида жами 110 млн.дан зиёд киши армияга жалб қилган, уларнинг 25 млн.га яқини ҳалок бўлган. Ҳарбий бўлмаганларни ҳам қўшиб ҳисоблаганда уруш қурбонлари сони 65 млн.дан ошади.

Жами 1,5 миллиондан зиёд Ўзбекистон фарзандлари бу қонли урушда тинчлик ва озодлик учун мардона жанг қилгани, уларнинг ҳар уч нафаридан бири ўз яқинлари бағрига қайтмагани, эл-юртимизнинг фронт ортида кўрсатган жасоратини халқимиз ҳеч қачон унутмайди. Бугунги тинч ва осойишта кунлар учун жонини фидо қилган аждодларнинг муқаддас хотирасини ёд этиб, эзгу ишларини давом эттириш, сафимизда юрган кексаларни эъзозлаш – одамийликнинг энг олий мезони ва бизга тинчлик, омонлик керак, деб яшайдиган бағрикенг ва олижаноб халқимизга хос азалий қадриятдир.