Ҳаётимиз қандай рангда, нима учун ундан кўнглимиз тўлмайди, каби саволлар бирзум бўлса-да хаёлимиздан ўтиши рост. Эҳтимол бунга кўп нарсани кўнглимизга яқин олиб, кимнингдир гап-сўзидан ранжишимиз, хафагарчиликни ҳамроҳимизга айлантиришимиз сабабдир. Аслида ҳаммаси ўз қўлингизда! Унутманг, ҳаётингизни фақат сиз бошқара оласиз!
- Кечаги кун билан хайрлашинг. Ўтмишдаги нохушликларни ўйлаб, бугунингизни ўтказиб юборманг. Олдинда бахтли келажак кутаётганини ўйлаб, бугнингизни бахтиёр ўтказинг!
- Кимни хафа қилиш осон, биласизми? Кимнинг ички дунёси шунга мойил бўлса, ана шулар ҳаёт зарбасидан мушт ейверишади. Сиз эса иродалисиз, уни синдиришларига йўл қўйманг.
- Ёмон ўй-фикрлар, хаёлларни узоқ-узоқларга улоқтиринг. Масофа шу қадар йироқ бўлсинки, изласангиз ҳам тополманг.
- Хотирангиздаги яхши кунларнигина ёдга олинг. Кўнглингиз тортмаганини эса бўлмагандек тасаввур қилинг.
- Бугунингиз — эртангиз учун пойдевордир. Шу сабаб яхши кайфиятни бугундан бошланг.
- Сизга қаратилган танқид тошларини фақат олға интилиш билан парчаланг. Уларнинг босимига тушиб қолишдан қочинг.
- Кучсизсан десалар, янада кучли бўлинг! Омадсиз десалар, омадни ортингиздан эргаштиринг. Шуни унутмангки, тақдирингиздаги ёзувлар ҳам сизнинг фойдангизни кўзлайди.
- Хотиржамлик. Мана сизнинг қуролингиз. Қандай вазият, имкон ва шароит бўлишидан қатъи назар, руҳингизни чўктиришни истаганларга хотиржамлик ва табассум билан жавоб қайтаринг.