Миннесоталик афро-америкалик Жорж Флойднинг ўлими билан бошланган намойишларнинг дунё бўйлаб қамрови тобора кенгайиб боряпти. Буюк Британиянинг бир неча шаҳарларида мамлакатда ўзгаришлар ва адолатни талаб қилаётган аҳоли вакиллари намойишлар ўтказмоқда.

Лондон, Бристол, Манчестер, Ноттингем, Глазго ва Эдинбург шаҳарлари кўчаларига чиққан одамлар ирқчилик ва полициянинг шафқатсизлигига қарши норозилик билдиришмоқда. Улар қўлларида ирқий камситишларга қарши турли шиорларни тутган ҳолда ҳукуматдан бу борада амалий чоралар кўришни талаб қилишмоқда. Ўн минглаб намойишчилар орасида ўз иш фаолиятида, кундалик турмушида ҳуқуқ тартибот органлар ёки иш берувчилари томонидан камситилган қора танли фуқаролар ҳам кўпчилик. Экспертларнинг таъкидлашича,  “Қора танлилар ҳаёти муҳим” деган шиор билан ўтказилаётган ушбу норозиликлар инсон ҳуқуқлари ва қора танлиларга нисбатан бўладиган  муносабатларда туб бурилиш ясаши мумкин.