1895 йил 7 май. Рус физиги ва электротехниги Александр Попов Санкт- Петербургда радионинг дастлабки вариантини оммага намойиш этди. Шу муносабат билан Арманистон, Беларусь, Россия каби давлатларда бугун радио куни.

Таъкидлаш жоизки, радио ҳақли равишда инсониятнинг буюк кашфиётларидан биридир. Энг қизиғи кўплаб мамлакатлар радио “бизда кашф қилинган” дея фахрланади. Масалан, АҚШда мазкур кашфиёт Дэвид Хьюз ва Никола Тесланинг илмий изланишлари эвазига дунёга келганини айтишади, Беларусда эса – Яков Оттонович Наркевич – Иодка, Россияда эса А.С. Попов, Ҳиндистонда Джагадиша Чандра Боше томонидан кашф қилингани айтилади. Ким томонидан кашф қилинганидан қатьи назар радио жамият шаклланиши ва ривожида катта роль ўйнаган, ўйнамоқда ва ўйнайди. Радио том маънода халқаро майдонда қўлга киритилган илмий-техник ютуқ ҳисобланади.

Авваллари радиостанциялар маълум вақт ўз эшиттиришларини эфирга узатган бўлса, бугунги кунда миллионлаб радиоканаллар туну кун фаолият юритмоқда. Инсоният олдинга интилар экан радио ҳам тараққий этиб бораверади ва одамларга янгиликларни етказиб беради. Бироқ, 7 май Бутунжаҳон радио куни сифатида нишонланмайди.

Радионинг инсоният ҳаётидаги аҳамиятини инобатга олган ҳолда, 1946 йил 13 февраль – “БМТ радиоси” ташкил этилган кун муносабати билан 2011 йил ЮНЕСКО Бош конференцияси томонидан 13 февраль – Бутунжаҳон радио куни, деб эълон қилинган.

Юртимизда эса алоқачилар куни сифатида ҳам кенг нишонланади.