• Биз ёшларимизда мактабданоқ IT технологиялардан фойдаланиш кўникмасини шакллантириб борсак, таълимнинг кейинги босқичларида уларга анча енгиллик яратган бўламиз. Ва мана шу жараёнда уларнинг иқтидорлилари юзага чиқади ҳамда келажакда улар худди шу йўналишда етуклик даражасига кўтарилиши мумкин. Лекин, тўғрисини айтиш керак, таълим масканларимизда бундай имконият тўлиқ мавжуд эмас. Мен халқ депутатлари вилоят кенгаши депутатлигига сайланган 55-Обизаранг сайлов округи ҳудудида ўрганишлар олиб бориб, ана шундай хулосага келдим. Ҳудудда 12 та мактаб бўлиб, уларда жами 5733 нафар ўқувчи таълим олишади. Ушбу таълим муассасаларининг барчаси тўлиқ замонавий компьютерлар билан жиҳозланмаган, афсуски баъзида информатикани ўқувчилар фақат назарий ўзлаштиришяпти, холос.
  Халқ депутатлари Сурхондарё вилоят кенгаши ёш депутатларидан бири, тадбиркор “TERMIZ GOLDEN CITY” МЧЖ таъсисчиси Жамшид Пардаев 55-Обизаранг сайлов округи ҳудудидаги 81, 50, 31-мактабларга 150 тадан китоб ва 2 тадан компьютер жамланмасини совға қилди. Тадбиркор мазкур ташаббуси билан барча депутатлар ва тадбиркорларни ўрта таълим мактабларини компьютер билан таъминлаш масаласига эътибор қаратишга чақирмоқда.

Чори Бозоров