Эрдўғоннинг айтишича, Туркия ШҲТ саммитида иштирок этгани учун Европа Иттифоқига ҳисобот беришга мажбур эмас.

Туркия президенти Режеп Таййип Эрдўғон Анқара Шанҳай ҳамкорлик ташкилотининг Самарқандда ўтказилган саммитида иштирок этгани учун Европа Иттифоқи олдида жавоб беришга мажбур эмаслигини айтди. Туркия дунёнинг барча мамлакатлари билан музокаралар олиб бормоқда, чунки ҳаммамиз дунёнинг бир бўлагимиз, дейди Эрдўғон PBS телеканалига берган интервьюсида.

«Европа Иттифоқи бизни 52 йил ўзидан узоқда ушлаб туради, яқинлашишга йўл қўймайди. Кейин эса, «нега бу давлат билан учрашдинг?, нега бошқаси билан учрашасан?», деб сўрайди. Биз ким билан музокаралар олиб борган тақдиримизда ҳам Европа Иттифоқига бу ҳақда ҳисобот беришга мажбур эмасмиз», — дея Туркия президентининг сўзларидан иқтибос келтирмоқда Yeni Şafak.

Туркия раҳбари мамлакат дунёнинг бир бўлаги экани, шунингдек, улар ҳар қандай давлат билан музокаралар олиб боришга ҳақли эканини таъкидлади ва Самарқандда Россия президенти Владимир Путин ҳамда Хитой етакчиси Си Цзиньпин билан музокаралар олиб борганини эслатиб ўтди.

Шунингдек, президент Европадаги давлат раҳбарларининг ҳеч бири унга бундай мазмундаги саволни бермаганини ҳам қўшимча қилди.

«Биз улар билан жараённи худди Шанхай Ҳамкорлик Ташкилотига аъзо давлатлар билан бўлганидек олиб борамиз”, — дея қўшимча қилди Эрдўған.