Жиззах вилояти ҳудудидан ўтган халқаро аҳамиятга эга М-39 автомобиль йўлида учта автомобиль иштирокида йўл-транспорт ҳодисаси содир бўлди. Бу ҳақда вилоят ИИБ ахборот хизмати хабар берди.

Маълум қилинишича, 3 июнь куни 07:30 ларда Жиззах вилояти ҳудудидан ўтган автомобиль йўлида Lacetti ҳайдовчиси белгиланган тезлик меъёрларига амал қилмасдан ҳаракатланиши ва Nexia-3 автомобиль ҳайдовчисининг эътиборсизлиги йўл-транспорт ҳодисасига сабаб бўлган. Яъни Lacetti автомобили катта тезликда Nexia-3 нинг орқа ён томонидан, бундан ташқари, ўз йўналишида ҳаракатланиб келаётган Damas’нинг орқа қисмидан уриб йўл четига чиқиб кетган.

«Соатига 100 километр тезликда келаётган эдим, йўлим очиқ эди, лекин Nexia-3 олдимдан чиқиб қолди», — дейди Lacetti ҳайдовчиси. Эълон қилинган лавҳадан кўриш мумкинки, ушбу ҳайдовчи машинаси салонига мол чарвисини ортиб олиб, юк ортиш қоидаларини ҳам бузган.

Тўқнашув оқибатида Nexia-3 ҳайдовчиси бошқарувни йўқотиб йўлни иккига ажратиб турувчи бетон тўсиққа урилиб, ағдарилган. Машина ҳайдовчиси ва йўловчисига биринчи тез тиббий ёрдам кўрсатилган.