«Толибон» Афғонистонда эркак ва аёлларнинг бир кунда боғларга ташриф буюришини тақиқлади. Бу ҳақда «Sputnik» хабар берди.
Келтирилишича, янги қонун бир вақтнинг ўзида турли жинс вакилларининг биргаликда дам олишига йўл қўймаслик учун қабул қилинган. Аёлларга якшанба, душанба ва сешанба кунлари, эркакларга эса ҳафтанинг қолган барча кунларида истироҳат боғларига боришга рухсат берилган.
Шу билан бирга, алоҳида дам олиш қоидасига қарамай, аёллар ҳижобда бўлиши талаб қилинган. Бунга қарши чиққанлар эса жазога тортилиши мумкин. «Толибон» ҳукумати ҳаракат аъзоларини жамоат жойларида дам олиш учун ҳарбий кийим ва қуролда бўлмасликка чақирган.
