ДУНЁ

Балки ғалати, балки мантиқий: ноодатий қонунлар

Айтишларича, одамзод қиладиган аҳмоқгарчиликнинг чегараси йўқ. Турли мамлакатларда қанақа тақиқлар борлигини билиб, бунга амин бўласиз…

Франциядаги токзорларга учар ликопча қўниши қатъий тақиқланган. Афсуски, ўзга сайёраликлар бундан бехабар.

Оклахомада итлар маҳаллий мэр томонидан имзоланган махсус рухсатномага эга бўлмаса, учтадан ортиқ зотнинг бир жойда тўпланиши ман этилган.

Германиядаги компаниялардан бирининг раҳбари ўз ходимларига арз-дод қилишни тақиқлаб қўйган. Ҳатто, ишхонада хўмрайиб юриш ҳам мумкин эмас.

Эстонияда ноталардан кўпайтириш ускунаси ёрдамида ксеронусха олиш ман этилган. Энди, ҳатто, катта-катта оркестр ва хорлар ҳам партитурадан бир нусха сотиб олиб, уни ксерокс ёрдамида кўпайтириб, ҳаммага тарқатиш ўрнига ҳар бир ижрочи учун алоҳида-алоҳида харид қилмоқда.

Хитойда чўкаётган одамни қутқариш тақиқланади. Негаки, бу унинг қисматига аралашишдай гап эмиш!

Американинг Теннесси штатида аёлларга машина бошқариш ман этилган. Аммо бир истисно бор. Агар йўловчи ва бошқа ҳайдовчиларни рулда аёл киши ўтирганидан огоҳ этиб, қизил байроқча кўтариб олган эркак юриб ёки югуриб бораётган бўлса, хоним машинани бошқаришга ҳақли.

Белорусияда қиш фаслида айиқларни суратга олиш учун уйғотиш тақиқланади.

Гавайи оролларида қулоққа танга қўйиш ман этилган.

Англия парламенти аъзоларига палатага рицарлик ёки бошқа аслаҳалар билан кириш… ҳамда парламент йиғилиши вақтида вафот этиш тақиқланади.

Флоридада чўмилиш кийимида қўшиқ куйлаш ҳамда рақамли белгиси бўлмаган скейтборд (роликли тахта)да юриш ман этилган.

Лос-Анжелесда қурбақани ялаш тақиқланган. Маълум бўлишича, Калифорния бақаларининг айрим турларида гиёҳванд моддалар мавжуд экан. Баъзи кишилар бундан ҳам фойдаланишлари мумкин.