Коррупцияга қарши курашиш агентлиги томонидан эълон қилинган янги қонун лойиҳасига кўра, давлат хизматчисига ўзаро қариндошлик ришталарига эга бўлган шахс билан хизмат қилаётгани ўзига маълум бўлган вақтдан бошлаб 10 кун муддат ичида давлат ташкилоти раҳбарига бу ҳақда хабар бериши керак бўлади.

Шунингдек, ўзаро қариндошларнинг (ака-ука, опа-сингил, уларнинг болалари, ота-онанинг ака-ука ва опа-сингиллари ҳамда уларнинг болалари, бобо ва бувиларнинг ака-ука ҳамда опа-сингиллари ва уларнинг болалари ҳамда шунга ўхшашлар), бир давлат ташкилоти ва унинг таркибидаги тузилмалар бири иккинчисига бевосита бўйсинувида ёки унинг назорати остида бўлганда хизмат қилишига йўл қўйилмайди.

Бундай ҳолат меҳнат шартномаси тузилгандан сўнг аниқланганда, иш берувчи ушбу ходимлардан бирини, бири иккинчисига бевосита ёки унинг назорати остида бўлмаган аввалгисига тенг бошқа ишга ўтказиш чораларини кўриши шарт.

Қонунга амал қилинмаган тақдирда маъмурий жавобгарликка тортиш таклиф этиляпти. Бунда:

қариндоши билан бирга ишлаётгани ҳақида хабар бермаслик учун — 5,4 млн сўмгача;

қариндошларни бошқа ишга ўтказмаганлик учун — 8,1 млн сўмгача жарима белгиланиши мумкин.