Сиз билан биз бугун шундай даврда яшаяпмизки, ҳар қадамда ахборот-коммуникация технологиялари имкониятларидан фойдаланишимизга тўғри келади. Бу борада малака ва кўникманинг мавжуд эмаслиги турли ҳаётий масалалар ечимида муаммоларни келтириб чиқариши ҳам бор гап. Мисол тариқасида айтадиган бўлсак, идорма-идора, эшикма-эшик юриб маблағ ва вақт сарфлаб, қанча асаббузарликларга дуч келиб бажаришимиз лозим бўлган юмушларни ўтирган жойимизда хонадан чиқмай, ахборот-коммуникация технологияларидан фойдаланган ҳолда адо этишимиз мумкин. Эртамиз эгалари бўлган ёш авлоднинг бу борадаги саводхонлигини юксалтириш бугун олдимизда турган долзарб масалалардан бири саналади. Президентимизнинг 2019 йил 15 февралдаги “Давлат хизматлари кўрсатиш миллий тизимини янада комплекс ривожлантириш чоралари ҳақида”ги ПҚ-4193-сонли қарорида умумий ўрта таълим мактабларининг юқори синф ўқувчиларига “Электрон ҳукумат” тизими хизматларидан фойдаланиш, талаб энг юқори бўлган давлат хизматларини замонавий ахборот-коммуникация технологияларидан, шу жумладан Ягона интерактив давлат хизматлари порталидан олиш кўникмаларига ўргатиш вазифалари белгилаб берилган.
