Жануби-Ғарбий махсус ҳарбий округ тасарруфидаги Термиз гарнизонида жойлашган ҳарбий қисмда 18-30 ёш атрофидаги 100 нафар яъни “Ёшлар дафтари”га киритилган, Сурхондарё вилоятида муқим иш жойига эга бўлмаган ҳамда ички ишлар назоратида бўлган ёшлар учун “Жасорат мактаби” ўқув йиғинининг навбатдаги мавсумига старт берилди.
Жорий мавсум иштирокчилари ҳарбий оркестр садолари остида тантанали кутиб олинди. Йиғин аввалида ёшлар тиббий кўрикдан ўтказилиб, уларга ҳарбий либослар берилди.
Йиғиннинг тантанали очилиш маросимида сўз олган ҳарбий қисм қўмондонлиги ҳамда вилоятнинг мутасадди ташкилот раҳбарлари ўз нутқида, ушбу йиғин ёшлар учун кўп имкониятлар ва шароитлар яратиб беришини сўзлаб, ундан оқилона фойдаланиш лозимлигини ва бунинг самараси сифатида ўткан йиғинлардаги ёшларнинг эришган ютуқларини мисол келтиришди ва йиғин давомида ёшларнинг улкан мувофаққиятларга эришишини тилашди.
Тадбирнинг бадиий қисми эса гўёки ҳарбий рухни уйғотувчи, қалбларга жўшқинлик бахш этувчи бир саҳна асарига айланди. Ҳарбий оркестрнинг оҳанглари юракларга ғурур туйғусини қадаган бўлса, қўл жанги кўринишлари жасорат ва мардлик рамзига айланди, фахрий қоровулларнинг саф чиқишлари эса тартиб ва интизомнинг тирик намунаси бўлди. Саҳнага чиқарилган тарихий сиймолар эса ёшларнинг руҳий оламига она юртнинг шонли ўтмишини жонли суратда олиб келди.
Маросимдан сўнг, ёшлар ўз қизиқишларига қараб, гуруҳларга ажратилди ва уларга кун тартибида белгиланган машғулотлар ҳақида маълумотлар берилди. Маълумот учун 10 кун давом этадиган йиғинда иштирокчилар ҳарбий тайёргарлик, спорт ўйинлари, маънавий-маърифий тайёргарлик ҳамда турли касбларни эгаллаши бўйича машғулотларга жалб қилинади.
