Сергели ҳамда Қўйлиқ метро йўналиши учун Россиядан яна 5 та янги поезд келди
26-октябр куни Тошкентга 20 та замонавий метро вагонлари кириб келди. Бу ҳақда Узрепорт ТВ мухбири хабар бермоқда. Маълум қилинишича, бугун Тошкент шимолий вокзалида мазкур поездларнинг тақдимот маросими ўтказилган.
Маълумотларга кўра, метро поездлар Россиянинг “Метровагонмаш” АЖ да ишлаб чиқарилган. Айни вақтда улар Москва, Қозон ва Боку метрополитенларида ҳам эксплуатация қилинмоқда.
Шунингдек, бу 5 та метро поездлар Тошкент метрополитенининг Сергели ҳамда Қўйлиқ йўналишларига жойлаштирилади.
Қолаверса, метро вагонлари янги техник ечимларга эга бўлиб,электр энергиясини 36 фоизгача тежаши маълум қилинган. Синхрон тортувчи учинчи авлод двигателининг қўлланилиши эса эксплуатацион харажатларни 40 фоизгача қисқартиради.
Ўзбекистон темир йўллари электрлаштириш лойиҳаси бошлиғи Наврўз Эркинов вагонлар ҳақида маълумот берганда унинг 30 йилгача бемалол Тошкент метро йўлларида хизмат қилишини айтган.
Шу билан бирга, Россиядан олиб келиниши керак бўлган метро поездлари тўлалигича етиб келганини маълум қилган.
Эслатиб ўтамиз, аввалроқ, 13-октябр куни «Трансмашхолдинг» АЖ таркибига кирувчи «Метровагонмаш» АЖ 20 та замонавий метро вагонларини ишлаб чиқариб, Тошкентга жўнатгани маълум қилинганди. Шунингдек, мазкур воқеадан сўнг, АЖ Тошкент метрополитени олдидаги контракт мажбуриятларининг бажарилиши якунланганини айтилганди.
Бундан ташқари, Тошкент шаҳрига кириб келувчи йўловчи транспортлар учун 6 та метро бекати атрофида автотураргоҳлар ташкил этилиши ҳақида ҳам хабар берилган эди.
