Жорий йилнинг 1 сентябридан МДҲ мамлакатлари, жумладан Ўзбекистон фуқаролари учун Россияга кириш тартиби ўзгаради. Шу муносабат билан “Uzbekistan Airways” AЖ Россияга боришни режалаштираётган йўловчилар учун киритилаётган янги тартиб ҳақида маълумот берди.
Қайд этилишича, энди ўзбекистонликлар “КОВИД-19 сиз саёҳат қиламан” (Путешествую без КОВИД-19) иловаси орқали тақдим этилган “яшил” статус QR кодини кўрсатишлари шарт бўлади.
QR кодни олиш учун қуйидагиларни амалга ошириш зарур:
- App Store, Google Play, AppGallery (Huawei иловалари дўкони) орқали “Путешествую без КОВИД-19” мобил иловасини юклаш;
- Мобил илова юкланганидан сўнг уни ишга тушириш, тил ва геолокацияни танлаш;
- Қайси давлатдан қайси давлатга кетаётганлигингизни белгилаш;
- 72 соатдан кўп бўлмаган вақтда ПЗР-тестини Ўзбекистонда аккредитациядан ўтган лабораторияларда топшириш. Лаборатория ходимига тест натижасини “Путешествую без КОВИД-19” мобил иловаси орқали олмоқчи эканлигингизни хабар бериш. Паспорт ва унинг серия рақамини киритиш;
- Телефонингиздаги мобил илова орқали лаборатория томонидан берилган ёки тест натижаларига тадқим қилинган QR кодни сканер қилиш;
- Чегарани кесиб ўтаётганингизда масъул ходимга QR кодни телефонингиз экрани орқали тақдим этиш.
