Украинанинг Лвов шаҳрида Украина Олий Радасининг собиқ спикери Андрей Парубий ўлдирилди. Бу ҳақда вилоят ҳарбий маъмуриятининг раҳбари Максим Козитский маълум қилди.
Украина Миллий полицияси шаҳарнинг бир туманида содир бўлган отишма оқибатида 1971 йилда туғилган “таниқли жамоат ва сиёсий арбоб” ҳалок бўлгани ҳақида хабар тарқатган, аммо улар вафо этган шахснинг исм фамилиясини келтирмаган.
Кейинчалик Парубийнинг ўлимини Лвов вилояти ҳарбий маъмурияти раҳбари Максим Козитский тасдиқлаган. Президент Владимир Зеленский ҳам Ички ишлар вазири Игор Клименко ва Бош прокурор Руслан Кравченко унга воқеа тафсилотлари ҳақида ҳисобот берганини маълум қилган ва Парубийнинг оиласига таъзия билдирган.Ҳодиса юзасидан тергов бошланган. Унда Миллий полициянинг Бош тергов бошқармаси, Лвов вилояти полицияси, Хавфсизлик хизмати ва бошқа идора ходимлари иштирок этмоқда.
Дастлабки маълумотларга кўра, ўт очган шахс озиқ-овқат етказиб берувчи компания курери бўлган. У отишмадан кейин электр велосипедда воқеа жойидан яширинган ва ҳозирда қидирилмоқда. Журналистларга кўра, Парубийга саккиз марта ўқ узилган.
Маълумот учун, Андрей Парубий 2013–2014 йиллардаги Евромайдон намойишларини ташкил этишда фаол иштирок этган. 2014 йилнинг бошида Парубий Украина Миллий хавфсизлик ва мудофаа кенгашига раҳбарлик қилган, бироқ бир неча ой ўтгач истеъфога чиққан. 2016–2019 йилларда Парубий Украина Олий Радаси спикери лавозимини эгаллаган. У мамлакат парламентининг ВИ, ВИИ, ВИИИ ва ИХ чақириқлари депутати бўлган, миллий хавфсизлик, мудофаа ва разведка қўмитасида ишлаган. 2019 йилда эса унга нисбатан ҳокимият ваколатини суиистеъмол қилиш бўйича жиноий иш очилган ва Парубий бюджет маблағларидан мақсадсиз фойдаланишда гумон қилинган.
