Пентагон (АҚШ мудофаа вазирлиги) буюртмаси асосида ишлаб чиқилган олисга учувчи икки янги ракета синовдан ўтказилди.
Булар — гипертовуш тезлигидаги Long-Range Hypersonic Weapon (LRHW) ҳамда юқори аниқликдаги Precision Strike Missile (PrSM) ракеталари.
Вашингтон ушбу ракеталар Европада Россияга қаршилик кўрсатиш учун яратилганини, улар Москвага дақиқалар ичида етиб бориши мумкинлигини яширмаяпти.
Декабрда синовдан ўтказилган LRHW ракетасига Канаверал бурнида старт берилди. Ракета режалаштирилган траекторияга кўтарилиб, мўлжални аниқ нишонга олди, бу ракетанинг илк муваффақиятли синови саналади. Ракета-ташувчи жанговар блок (Joint Common Hypersonic Glide Body (C-HGB))ни етарли парвоз тезлигига олиб чиқади, сўнгра унинг ўзи мустақил ҳаракатланади. Пентагон маълумотига кўра, жанговар блок тезлиги — 5М, учиш узоқлиги 2 775 километрдан ошади.
Lockheed Martin компанияси томонидан чиқарилаётган Precision Strike Missile ракеталари ATACMS ракеталари ўрнини эгаллаши кутилмоқда. Айрим манбалар хабарига кўра, Пентагон янги PrSM ракеталарини Украина жанг майдонларида синаб кўриши мумкин. Албатта, бунинг учун қайсидир сабаб билан янги ракеталар Украинага топширилиши керак бўлади.
