Ҳиндистон ва Бангладешда кучли тўфон кузатилди. Ҳиндистоннинг Ғарбий Бенгалия штатида шамолнинг тезлиги соатига 190 км га этди. Дараxтларнинг қулаши натижасида 2 кишининг ҳалок бўлгани айтилмоқда. Ҳиндистонда 450 мингга яқин, Бангладешда эса икки миллиондан кўпрок одам эвакуация қилинди.
Иккала мамлакатда ҳам эвакуация жараёни коронавирус инфекцияси тарқалишининг олдини олиш мақсадида ижтимоий масофа сақлаш қоидаларига риоя қилинган холда амалга оширилди. Бироқ бошқа ҳудудларга ўтказилганларни баъзи маҳаллий аҳоли вакиллари вирусдан қўрқиб, уйларига қабул қилишни хоҳлашмаяпти. Мутасаддилар карантин шароитида одамларни эвакуация қилиш ва хавфсиз ҳудудларга жойлаштиришда бир қанча муаммолар юзага келаётганини билдиришяпти.
Сўнгги 20 йил ичида юз берган энг кучли тўфон деб баҳоланаётган ушбу табиий офат Ғарбий Бенгалия штатининг маркази Калкуттага катта талофотлар етказди. Кучли шамол сабаб электр энергия таъминоти узилиб қолган. Бундан ташқари, кўплаб тураржой бинолари, қурилиш объектлари, автомобилларга зарар етган. Маълумотларга кўра, тўфон Бенгал кўрфазидан кириб келган.
