Қутқарувчилар британиялик тадбиркор Майкл Линч ва унинг қизининг жасадини Италия қирғоқлари яқинида чўкиб кетган яхта ичидан топди. Бу ҳақда Сицилия фуқаролик мудофааси хизмати бош директори Салваторе Косина маълум қилди.

Ғаввослар 49 метр чуқурликда ётган яхтадан тўрт кишининг жасадини олиб чиқишга муваффақ бўлишди, улар орасида Линч ва унинг қизи ҳам бор. Яна икки йўловчи ҳамон бедарак йўқолган, деб ёзади The Telegraph.

Чўкиб кетган яхта бортида жами 22 киши, жумладан, Буюк Британия, АҚШ ва Канада фуқаролари бўлган. 15 киши қутқарилган. Улардан тўққиз нафари экипаж аъзолари бўлган.