Россияда COVID-19 билан касалланишнинг янги нуқталари пайдо бўляпти. Красноярскдаги Еруда кишлоғида жойлашган «Полюс» олтин қазиб олиш компаниясининг 866 нафар xодимида коронавирус инфекцияси аниқланди.
Вирусни юқтиришнинг дастлабки ҳолатлари май ойи бошида компанияга тегишли «Олимпиада» тоғ-кон комбинатида маълум бўлганди. Энди уларнинг сони кўпайди. Яна 2790 нафар ишчи коронавирусга текширувдан ўтказилди. Уларнинг соғлом эканлиги тасдиқланган. Ҳудудда 1100 ўринли дала касалхонаси қурилмокда. Ҳарбийлар эпидемияга қарши тарғибот тадбирларини ўтказяпти. «Олимпиада» тоғ-кон комбинати Красноярскдан 540 км. масофада жойлашган. Бу Россиядаги энг йирик олтин қазиб олувчи корxона бўлиб, унинг секинлашиши ёки тўxтатилиши бутун соҳага таъсир қилиши мумкин.
Бугунги кунга қадар Россияда вирусдан энг кўп зарар кўраётган ҳудуд- Доғистон Республикаси бўлиб турибди. Бу ерда 3500 дан ортиқ COVID-19 билан касалланиш ҳолати қайд этилган бўлиб, 29 киши вафот этган. Сўнгги бир кун ичида Россияда яна 8764 та янги ҳолат аниқланди, жами касалланганлар сони эса 300 мингдан ошган.