Ўтган йил охирида Ўзбекистонда жиноий гуруҳлар аъзоларини қўлга олиш бўйича оммавий рейдлар бошланганди. “Долзарб 40 кунлик” тадбирлари доирасида “Бахти Ташкентский” номи билан танилган криминал авторитет Бахтиёр Қудратуллаев қўлга олинган. Эндиликда эса унинг Туркманистонга қочган шериги ҳам ушлангани маълум бўлди. Бу ҳақда “Хроники Туркменистана” хабар берди.
Айтилишича, рейдлар бошлангунича, Ўзбекистон махсус хизматлари туркманистонлик ҳамкасбларига жиноий гуруҳ аъзоларидан бири 7 декабрь куни мамлакат чегарасини ноқонуний кесиб ўтиб, қочишга муваффақ бўлгани ҳақида тезкор маълумот берган.
Туркманистон Миллий хавфсизлик вазирлигига гумонланувчининг ўша пайтда қаерда эканлиги ҳақида ҳам хабар юборилган. У Тошкентда жиноий оламга қарши кураш тадбирлари давомида қўлга олинган, Жиноят кодексининг 165-моддаси 2-қисмида назарда тутилган жиноятни содир этганликда айбланган Наргиза Жуманиёзованинг синглиси Бибижон Жуманиёзованинг уйидан топилган.
Қидирув натижасида эркак 9 декабрь куни қўлга олинган, эртаси куни эса “Шовот” чегара божхона постида Ўзбекистон махсус хизматларига топширилган.
Бундан ташқари, “Бахти Ташкентский”нинг шериги яширинган Бибижоннинг уйидан Ўзбекистонда ишлаб чиқарилган 12 қути дори воситалари топилган. Маълум бўлишича, аёл дори воситалари контрабандаси билан шуғулланган. Унга нисбатан жиноий иш қўзғатилган.
