Тошкент вилояти ҳокимлиги учта машинанинг қонунчиликка зид равишда харид қилинаётганини рад этди
Куни кеча интернет тармоғида Тошкент вилояти ҳокимлиги томонидан учта электромобиль амалдаги қонунчиликка зид равишда харид қилинаётгани, Бунинг учун 1,3 млрд сўм ажратилгани ва ҳокимликнинг расмий веб сайтига нотўғри ахборот киритилгани ҳақида хабарлар тарқалди.
Ҳокимлик мазкур хабарларга муносабат билдирди.
Қайд этилишича, Тошкент вилояти ҳокимининиг биринчи ўринбосарига 2021 йили ишлаб чиқарилган Мерседес Бенз 10 001 ТВХ хизмат машинаси сифатида бириктирилмаган. Бу нотўғри ахборот. Вилоят ҳокимининг биринчи ўринбосарига 2009 йилда ишлаб чиқарилган Мерседес Бенз 10 003 DAV русумли машина бириктирилган.
Вилоят ҳокимининг Ёшлар сиёсати, ижтимоий ривожлантириш ва маънавий-маърифий ишлар бўйича ўринбосарига бириктирилган 10 013 DAV автомашинаси ҳақиқатан ҳам 2020 йилда ишлаб чиқарилган.
Ўзбекистон Республикаси Вазирлар Маҳкамасининг “Давлат бошқаруви органларида хизмат автотранспорт воситаларидан фойдаланиш тизимини тубдан такомиллаштириш чора-тадбирлари тўғрисида” 258-сонли Қарорининг 6-бандида хизмат машиналарини янгилаш тартиби белгиланган.
Хусусан, 5 йил фойдаланишда бўлган машиналар, шунингдек, фойдаланишга яроқсиз ҳолга келган машиналар алмаштирилиши ёки қуйи тизим ташкилотларига фойдаланиш учун берилиши кўрсатиб ўтилган.
Вилоят ҳокимининг Ёшлар сиёсати, ижтимоий ривожлантириш ва маънавий-маърифий ишлар бўйича ўринбосарига бириктирилган 10 013 DAV автомашинаси 2020 йилда ишлаб чиқарилган, ҳозирги кунга келиб йўл-транспорт ҳодисасига учрагани сабабли, техник жиҳатдан яроқсиз ҳолга келган.
Харид қилинаётган хизмат янги машиналари (электромобил, гибрид) давлат раҳбарининг ПҚ-443 сонли қарорида белгиланган вазифалар доирасида амалга оширилмоқда. Янги автотранспорт воситалари харид қилинганидан кейин амалда фойдаланилаётган машиналар тегишли тартибда ҳисобдан чиқарилади.
