Шахсий манфаат кўзлаган айрим фуқаролар хориждан қалбаки валюта қимматликларини олиб келиб, муомалага киритиш орқали мўмай даромад топишга уринмоқдалар.

Қалбаки банкнотларнинг муомалага чиқарилиши давлатнинг иқтисодий хавфсизлигига таҳдид саналади.

Давлат хавфсизлик хизматининг Тошкент шаҳар бўйича бошқармаси ходимлари томонидан Бош прокуратура ҳузуридаги Департамент билан ҳамкорликда Сергели туманида ўтказилган тезкор тадбирда 1974 – 1982 йиллар оралиғида туғилган 4 нафар фуқаро 100 минг қалбаки АҚШ долларини 70 минг АҚШ долларига сотган вақтларида ашёвий далиллар билан ушланди.

Шунингдек, улардан бирининг яшаш хонадонидан ҳам 10.950 қалбаки АҚШ доллари тегишли тартибда расмийлаштириб олинди.

Ҳозирда ҳолат юзасидан мазкур шахсларга нисбатан Жиноят Кодексининг 176-моддаси 2-қисми “в” банди билан жиноят иши қўзғатилиб, тергов ҳаракатлари олиб борилмоқда.

Ҳурматли фуқаролар валюта айирбошлаш масаласида банк муассасаларига мурожаат қилишларингизни сўраб қоламиз.