15 июль куни Самарқанд вилоятининг Каттақўрғон туманида бир қиз тўрт эркак томонидан зўрланди. Бу ҳақда Nemolchi.uz лойиҳаси хабар берди.
Маълум қилинишича, қиз ўша куни уйидан 300 метр узоқликда бўлган қариндошиникига бораётганида бир гуруҳ маст одамлар томонидан зўрланган. Маст қўшниси унинг қўлидан ушлаб олган ва унга муқаддам судланган яна бир киши қўшилган.
Қизни зўрлик билан уйга судраб киришган, уч киши уни калтаклаган ва зўрлаган, қаршилик кўрсатмаслик учун унга пичоқ билан таҳдид қилишган. Кейин эркаклар танишига қўнғироқ қилиб, уни зўрлашга қўшилишга таклиф қилган. Кейин қизни ўлдираман деб қўрқитиб, яна калтаклашган ва жим туришини айтишган.
Шундан сўнг, қиз қонга беланган кўйлаги билан шок ҳолатда қариндошиникига етиб келган ва туман ички ишлар ходимига мурожаат қилинган. Жабрланувчининг қариндошлари айтишича, туман ИИБ ходими ҳафта охири бўлгани учун душанба куни келишларини айтган. Душанба куни эса экспертиза учун йўлланма бермаган. Шундан сўнг улар прокуратурага боришга мажбур бўлган, суд экспертизаси эса шундан кейингина — 18 июль куни ўтказилган.
Экспертиза натижаларига кўра, биоматериалларда бир нечта намуналар топилган бўлса-да, иш фақат илгари судланган битта гумонланувчига нисбатан қўзғатилган.
Қизнинг қариндошлари сўзларига кўра, қолганлар бу ишга жалб қилинмаган. Айтилишича, уларнинг икки нафари Россияга ишлаш учун кетиб қолган.
Nemolchi.uz лойиҳаси Бош прокуратурага ушбу ишни назоратга олиш ҳамда Самарқанд вилояти ИИБ фаолиятини текширишни сўраб мурожаат қилди.
