АҚШ Президенти Жо Байден ва баъзи америкалик қонунчилар Конгресснинг зарур рухсатисиз Украинага ҳарбий ва молиявий ёрдам бериб, мамлакат конституциясини бузди. Бу фикрни кеча, 17 февраль куни АҚШ Конгресси Вакиллар палатаси аъзоси Маржори Тейлор Грин ўзининг Twitter’даги саҳифасида билдирди.

“Қўшма Штатлар Президенти ва конгрессменларнинг бир қисми Конгресснинг урушга киришга тўлиқ рухсатисиз ҳарбий операцияларни молиялаштириш, қуроллантириш, ўқитиш ва ёрдам бериш каби ҳаракатлари билан конституцияни бузди. Буларнинг барчаси урушга олиб келади. Украина НАТО аъзоси эмас, иттифоқчи ҳам, демократия ҳам ундан узоқда”, деб ёзади Жоржиядан сайланган республикачи.

Гриннинг сўзларига кўра, америкаликлар Украинадаги урушни умуман қўллаб-қувватламайди ва Вашингтон бу урушни молиялаштириб, рағбатлантираётганидан жуда норози.
Маълумот учун, АҚШ Сенатидаги демократлар етакчиси Чак Шумер америкалик қонунчилар ўтган йили Украинага 113 миллиард долларлик ҳарбий, иқтисодий ва гуманитар ёрдам кўрсатишни маъқуллаганини айтган.

Эслатиб ўтамиз, жорий йилнинг 20 февраль куни АҚШ Президенти Жо Байден давлат раҳбари сифатида илк бор Киевга борган, украиналик ҳамкасби Владимир Зеленский билан учрашиб, Украинага яна 500 миллион долларлик ҳарбий ёрдам пакети ажратилишини айтганди. 24 февралда эса АҚШнинг Украинага 2 миллиард долларлик ҳарбий ёрдам пакети эълон қилинганди.