Анқара Бош прокуратураси ўтган ҳафта Туркиянинг Стокголмдаги элчихонаси яқинида Қуръонни ёқиш акциясини уюштирган ўнг қанот экстремистик “Қаттиқ курс” партияси етакчиси Расмус Палудан ва нидерландиялик сиёсатчи Эдвин Вагенсвелдга нисбатан тергов бошлади. Бу ҳақда ТАСС хабар бермоқда.

Ишнинг қўзғатилишига ушбу шахсларнинг Швеция ва Голландиядаги сўнгги ҳаракатлари сабаб бўлган. Тергов материалларида Палуданнинг 21 январь куни Стокголмда ва 27 январда Копенгагенда Қуръонни ёқиб юборган ҳаракатлари ҳақида сўз боради.

Бундан ташқари, прокуратура Нидерландияда фаолият юритувчи “Ватанпарвар европаликлар Ғарбнинг исломланишига қарши” (PEGIDA) ўнг қанот экстремистик ҳаракати раҳбари Эдвин Вагенсвелд билан қизиқиб қолди. Тергов Туркия Жиноят кодексининг бир қатор моддалари, хусусан, нифоқ ва адоват қўзғатиш, диний қадриятларни оёқ ости қилиш, эътиқодни омма олдида ҳақорат қилиш учун жавобгарлик билан боғлиқ моддалар асосида бошланган.

Палуданнинг акциялари Туркия ва Швеция ўртасида жиддий жанжалга сабаб бўлди. Қуръон ёқишдан олдинги нутқида у Туркия президенти Тойиб Эрдўғонни танқид қилган, шунингдек, Муҳаммад пайғамбар карикатурасини ҳам кўрсатган.

Эрдўғоннинг айтишича, Стокголмдаги бу ва Туркияга қарши бошқа ҳаракатлардан сўнг Швеция Анқарадан унинг НАТОга кириш аризасини қўллаб-қувватлашини кутмаслиги керак. Туркия ташқи ишлар ва мудофаа вазирликлари раҳбарлари ҳам худди шундай руҳда сўзлашди.

Айни пайтда Швециянинг аризасини тасдиқлаш билан боғлиқ жараён тўхтатилган. Швеция ва Финляндиянинг НАТОга аъзо бўлишлари учун тегишли қонун лойиҳасининг Туркия парламенти томонидан маъқулланиши керак.