23 январь куни эрталаб Покистонда электр узатиш линияларида рўй берган йирик авария туфайли бутун мамлакат бўйлаб электр энергияси узилиб қолди, дея хабар беради Покистон Энергетика вазирлиги.

Вазирлик душанба куни маҳаллий вақт билан соат 7:34 да мамлакат миллий тармоғи электр узатиш линияларининг нотўғри ишлаши, «кенг миқёсдаги электр тармоғидаги носозлик» туфайли ишламай қолганини маълум қилди.

«Тизимга техник хизмат кўрсатиш давом этмоқда», – дейилади хабарда.

Пойтахт Исломобод, жанубдаги Карачи порт шаҳри, мамлакат шарқидаги Лаҳор ва шимолдаги Пешоварда электр энергияси узилди.
Тахминан 220 миллион киши электр таъминотидаги узилишлар туфайли электр таъминотидан маҳрум, деб хабар беради АNI.
Quetta Electric Supply Company (QESCO) маълумотларига кўра, Гуддудан Кветтагача бўлган иккита электр узатиш линияси узилган. Компаниянинг маълум қилишича, Балужистоннинг 22 тумани, жумладан Кветта ҳам электр таъминотисиз қолган.

Покистон шимолидаги Балужистон вилоятидаги шифохоналар, бозорлар ва уйларда электр энергияси узилиб қолди.

Кейинроқ Энергетика вазирлиги пойтахт Исломобод ва Пешоварда «чекланган миқдордаги тармоқлар» тикланганини маълум қилди.
Мамлакат иқтисодиёти кўплаб муаммолар, жумладан жиддий энергетика инқирози билан курашда давом этмоқда.

Покистонда талабни қондириш учун етарли ўрнатилган қувват мавжуд, бироқ нефть электр станцияларини ишлатиш учун ресурслар етишмайди, дея хабар беради Аlarabiya.
Покистон ҳукумати шу ой бошида энергияни тежашнинг янги режасини эълон қилди.

Бош вазир Шаҳбоз Шариф барча федерал идораларга энергия сарфини 30 фоизга қисқартиришни буюрди ва унинг ҳукумати барча бозорларни соат 20:30да ва ресторанларни соат 22:00да ёпишни буюрди.