Париж апелляция суди Франциянинг собиқ президенти Николя Саркозини «телефон суҳбатларини сўроқсиз эшитиш иши» бўйича бир йиллик қамоқ жазосига ҳукм қилди. Суд қарори ҳақида France24 телеканали хабар бермоқда.

Бу ишда собиқ президентдан ташқари унинг адвокати Тери Эрзог ва собиқ судя Гилберт Азибер ҳам айбланган эди.

Унга кўра, Саркози ўз адвокати орқали Азиберга Монакода лавозим эгаллашига ёрдам беришни ваъда қилган. Бунинг учун у L’Oreal  компанияси томонидан Саркозининг сайловолди кампаниясини ноқонуний молиялаштириш бўйича терговнинг бориши ҳақида маълумот бериши керак эди.

Маълум қилинишича, тергов телефон суҳбатларидаги тингланган кўплаб ёзувларга таянган. Суд Саркози, Эрзог ва Азибер ўртасида келишилган «коррупция шартномаси» мавжудлигини аниқлади.

Эслатиб ўтамиз, 2021-йилда Париж суди Саркозини коррупция ва таъсир ўтказишда айбдор деб топган ва уни уч йилга озодликдан маҳрум қилган эди. Шунингдек, Эрзог ва Азибер ҳам айбдор деб топилган. Шундан сўнг, ишдаги барча айбланувчилар апелляция шикоятини беришган эди.