Тошкент шаҳрида ҳуқуқ-тартибот идоралари ходимлари яна бир молиявий пирамидани фош этди. Бу ҳақда шаҳар ички ишлар бош бошқармаси хабар берди.
Қайд этилишича, молиявий пирамида асосчиси Телеграмъда гуруҳ ва канал яратган. Унда дастлаб 125 киши бўлган. Улар беш киши иборат қисмларга бўлинган. Қоидаларга кўра, иштирокчи 1 миллион сўм ўтказади, бир ҳафта ўтиб эса 1,7 миллион сўм қилиб қайтариб олади.

«Ҳамма ўз навбатида пул олди. Кейин одамлар қариндошларини гуруҳга қўшишни бошлади ва иштирокчилар сони кўпайди. Шундан сўнг тузилма бузилди», — деган пирамидани ташкил қилган аёл.

Унинг реклама билан шуғулланадиган иккита ёрдамчиси бўлган ва улар одамларга шартларни тушунтирган.
Аёл бир ҳафта ичида муайян маблағни 70 фоиз ошириб беришга ваъда берган. Лекин пулларни ўзлаштириб олган. Бу бўйича 60 дан ортиқ киши ИИБга мурожаат қилган.
Қоидага кўра, пулнинг бир қисми депозит омонатга юборилган. Яна бир қисми админларга жўнатилган. Шунда ҳам ўзимга қанчадир миқдорда пул қоларди”, — дейди у.

Ҳолат юзасидан Жиноят кодексининг 188-1-моддаси 2-қисми (пул маблағларини ёки бошқа мол-мулкни ноқонуний жалб этиш) билан жиноят иши қўзғатилган. Ҳозирда тергов ҳаракатлари олиб борилмоқда.
Аввалроқ Жиззахда молиявий пирамидани тарғиб қилиш орқали фуқароларнинг 692,3 млн сўмини қўлга киритган шахслар аниқлангани, Тошкентда молиявий пирамида ташкил қилиб, фуқароларнинг пулларини ўзлаштирган «Реалная Инвестиция» раҳбари ушлангани, Қашқадарёлик фуқаро молиявий пирамида ташкил қилиб, 231 нафар фуқаронинг 13,7 млрд сўм пулини ўзлаштиргани ҳақида хабар берилган.