«Twitter» аудити АҚШнинг амалдагим президенти Жо Байденнинг мазкур ижтимоий тармоқдаги обуначиларининг деярли ярми сохта эканини кўрсатмоқда.

«SparkToro» дастурий таъминот компанияси томонидан «Twitter» ижтимоий тармоғида ўтказилган аудит натижасида маълум бўлишича, Жо Байденнинг 22 миллиондан ортиқ обуначиларининг 11 миллионга яқини ботлар экани аниқланган.

Ҳали ҳам бу компанияни сотиб олишни режалаштираётган Илон Маскнинг ўзи билан боғлиқ ҳолат эса яна ҳам қизиқроқ – «Tesla» ва «SpaceX» компаниялари раҳбарига обуна бўлган аккаунтларнинг 70 фоизи сохта экани айтилмоқда.

Аввалроқ Илон Маск ижтимоий тармоқдаги аккаунтларнинг 20 фоизи сохта ботлардан ташкил топганини айтиб, компанияни 44 миллиард долларга сотиб олиш бўйича битимни якунлашни ортга сурган эди. Бундан ташқари, миллиардер компания раҳбарияти аудит маълумотларини тақдим этишдан бош тортаётганини очиқ айтган эди.

«Менинг даъволарим Twitter SEC ҳужжатларига асосланган эди. Twitter бош директори компания аудити натижаларини ошкор қилишдан бош тортди. Директор менга аудит натижасини кўрсатмагунча бизнинг келишувимиз амалга ошмайди», — деб ўзининг мазкур тармоқдаги саҳифасида пост қолдирган эди Илон Маск.

Илон Маскнинг ўзининг «Twitter»даги аудиториясини таҳлил қилгач, SparkToro компанияси дунёдаги энг бой одамнинг қарийб 93.5 миллион обуначисининг 70 фоизи сохта бўлиши мумкинлигини айтди.

Шу билан бирга, компаниянинг таъкидлашича, бундай ботлар асосан машхур одамларнинг обуначилари орасида кўп учраши мумкин.

Twitter ҳар куни ярим миллионгача спам-аккаунтларни, шунингдек, шубҳали кўринадиган бир неча миллион аккаунтларни блоклашини айтди.