Бу саволни ўзимга бериб, жавоблар орасида адашиб кетдим. Эҳ-ҳе, шунақа кўп нарсани кутишимни ўзим ҳам билмас эканман. Инсоннинг истаклари ҳамиша имконидан анча баланд бўлишига яна бир бор амин бўлдим. Демак, тупроғида тетапоя қилганим, болалигим, бугуним ва келажагимни у билан боғлаганим – Ўзбекистондан нималар кутяпманикин?
Қанийди, айни кучга тўлган, ижоду меҳнатга иштиёқи баланд паллада Ўзбекистон ёшлари “прописка”, “уй-жой қилиш”, маоши меҳнатига арзийдиган иш қидириш каби масалалар билан истеъдоди, иқтидори, иштиёқини сўндириб қўймаса…
Қанийди, тиббиёт ходимлари чўнтагингиздан чиқадиган уч-тўрт сўм пулга кўз тикиб турмаса, ор қилса, шундай ҳолга тушмаслиги учун маоши эҳтиёжларига етиб ортса, кўзи тўқ бўлса…
Қанийди, халқимизнинг аёл кишига муносабати ўзгарса, онги, дунёқараши кенгайса. Унинг ҳам уй юмушларидан ташқари, олийроқ мақсади мавжудлиги, дунёга бошқалар каби бир марта келишию бу дунёдан кутганлари, ўзига яраша орзу-умидлари борлиги инобатга олинса… Маиший юмушлардан ортмаган, топганини билим ёки ҳунарга эмас, ялтир-юлтур матога сарфлаган онанинг фарзандлари қандай бўлиши ҳақида бир марта бўлса ҳам ўйласалар, қанийди!
Қишлоқлардаги ака-опаларим топган уч-тўрт сўм пулини қишдан омон-эсон чиқиб олиши учун – ўтин ёки кўмиргагина сарфламаса… Қишни амал-тақал шифтга термилиб, баҳорни кутиб яшамасалар, қанийди… Чекка қишлоқларда ҳам ишлаб чиқариш корхоналари, цеҳлар қурилса, мавсумий ишлардан қутулсалар… Қора қозонини қайнатиш илинжида узоқ ўлкаларга кетмасалар, қурмағур пулни деб оиласини, фарзандларини бой бериб қўймасалар эди…
Ҳар ким қурби етадиган ишни қилса: зиёли кетмон тутмаса, ҳокимият маддоҳ қўлига ўтмаса…
Ўзбекистон, шу инсонларнинг бари сени каму-кўстинг билан яхши кўради. Сендай жаннатмакон юрт, бағридарё, меҳмондўст халқни бошқа диёрлардан тополмаслигига кўзи етади. Бир ўтинчим борки, шу меҳнатсевар, қалби пок халқингни қадрига ет! Улар ҳам дунёнинг бир четидаги бошқа давлат фуқаролари каби турмуш кечириши, таълим олиши, фарзандлари ва соғлигини сенга ишониши, келажагидан катта умидлар кутишга ҳаққи борлигини унутма! Улар шу тупроқни севганлари учун ҳам тарк этиб бошқа ёқларга кетолмайди, камчиликларингни ўртага ташлаб, уни бартараф этишга интиладилар. Бундай халқни эъзозла! Зеро, уларнинг янги Ўзбекистондан кутаётганлари пучга чиқмасин! Сенинг равнақинг ва фаровонлигинг йўлида бор куч-ғайратини сарфласин!
Янги Ўзбекистондан кутаётганларим шу – янги, инсонпарвар ҳукумат ва янги дунёқарашга эга, илмли халқ.
Севара Алижонова
