Ўзбекистон Республикаси Президенти Шавкат Мирзиёевнинг тўнғич куёви, тадбиркор Турсунов Ойбек Ботирович “Капиталбанк” АТБнинг аффилланган шахслари рўйхатидан чиқарилди. Унинг ўрнига Россиянинг “Телекоминвест” МЧЖ (Алишер Усмоновнинг “USM Holding Company ” МЧЖ шўба корхонаси) ва “Korus” АЖ компаниялари рўйхатга киритилди. Бу ҳақда Ягона корпоратив ахборот порталида келтирилган.
Банк томонидан эълон қилинган моддий фактга асосан, “Телекоминвест” МЧЖ ҳозирда банкнинг энг йирик акциядори ҳисобланади.
Эслатиб ўтамиз, 2021-йил октябр ойи охирида Ойбек Турсунов биржадан ташқари бозорда акцияларнинг 34,1 фоизини сотиб олиб, банк устав капиталидаги улушини 50 фоизга оширган эди. Аммо банкнинг “Телекоминвест” билан келишувидан сўнг Турсуновнинг акциялари 41,6 фоизга тушди.
2021-йил ноябр ойи ўрталарида “Телекоминвест” банкнинг 65,97 миллион дона акциясини 215,3 миллиард сўмга сотиб олди, бу устав капиталининг 16,7 фоизини ташкил этди. 10-январ куни эса Телекоминвест Капиталбанкнинг навбатдаги улушини сотиб олди ва шу тариқа ўз улушини 25 фоизга оширди.
Биржада 2022-йилнинг 6-январидан 18-январига қадар “Капиталбанк” акциялар пакетлари билан 975,46 миллиард сўмлик 9 та битим рўйхатга олинган (ҳар бир битимда 32,98 миллион дона акция ёки банк устав капиталининг 8,33 фоизи).
2022-йил 21-январда Молия вазирлиги томонидан “Капиталбанк”нинг умумий қиймати 31,3 миллиард сўмлик 32,98 миллион дона оддий акциялари қўшимча чиқарилиши рўйхатга олинди. Банк Кузатув кенгашининг қарорига кўра, акциялар хусусий жойлаштирилади.
Ҳозирги кунда АТБ “Капиталбанк” Ўзбекистондаги энг йирик хусусий тижорат банкларидан бири ҳисобланади. Жорий йилда банк Ўзбекистон Республикаси валюта биржасининг биринчи маркет-мейкери бўлди. Бундан ташқари, банкнинг муҳим ютуғи Ўзбекистон Республикасида биринчи рақамли банк «БАНК АПЕЛСИН» АЖ шўба корхонаси билан банк гуруҳининг ташкил этилиши бўлди.
