Бугун Парламент қуйи палатасининг ялпи мажлиси тўғридан тўғри эфирга узатилаётган эди.

Кейин узиб қўйилди. Бунга Олий мажлис Қонунчилик палатаси қуйидагича баёнот берди: «Uzreport» телеканали аввалдан режалаштирилган Бокс бўйича Ўзбекистон чемпионатини соат 11:00дан бошлаб эфирга узатиш мақсадида Қуйи палата мажлисини эфирга узатишни тўхтатган.

Ўзбекистон Республикаси Президентининг 2021 йил 16 июндаги ПФ-6247-сон Фармонига биноан эса  Ўзбекистон Миллий телерадиокомпанияси Ўзбекистон Миллий ахборот агентлиги билан биргаликда  2021 йил 1 декабрдан бошлаб Олий Мажлис Қонунчилик палатаси ва Сенати мажлислари, Қорақалпоғистон Республикаси Жўқорғи Кенгеси, халқ депутатлари вилоят, туман, шаҳар Кенгаши сессиялари тадбирлари телеканаллар, шунингдек, Интернет тармоғи орқали жонли эфирга узатилишини таъминлаши кераклиги белгиланган.

Давлетов мазкур вазиятга шундай изоҳ ёзмоқда: “Парламент президент фармонини ижро этмаяпти. Депутатлар сайловчиларни алдаяпти. Президент фармонини ижро этмаётган парламент қуйи палатаси айбни UzReport’га тўнкабди. Боз устига, бу канал хусусий бўлса”.

Фармондан келиб чиқадиган бўлсак, Президент Фармони ижроси таъминланмаяптими? Ўзбекистон Миллий телерадиокомпанияси ва  Ўзбекистон Миллий ахборот агентлиги  очиқлик ва ошкораликни таъминлаш бўйича амалга оширилаётган ислоҳотларни тўлиқ қўллаб-қувватлашда сусткашлик қиляптими?! Саволлар кўп.