Музработ туманидаги масъуляти чекланган жамиятлардан бирининг раҳбари фаолият турини кенгайтириш мақсадида жамиятга тегишли бўлган “HOWO” русумли юк машинасини гаров сифатида қўйиб банкдан катта миқдорда кредит олади.

Бироқ, олинган кредит маблағлари ўз вақтида қайтарилмагач, Шеробод туманлараро иқтисодий судининг жорий йил июнь ойидаги ижро ҳужжатига асосан, қарздор жамиятдан банк фойдасига 334 миллион сўм ундириш белгиланади.

Мажбурий ижро бюроси Музработ туман бўлими томонидан олиб борилган мажбурий ижро ҳаракатлари давомида қарздор жамиятга тегишли бўлган юк машинаси хатланиб, вақтинча сақлаш учун жамият рахбарига далолатнома ва тилхат асосида, хатланган мулкни қонунга зид равишда тасарруф етган тақдирда жиноий жавобгарликка тортилиши ҳақида огоҳлантириб топширилган эди.

Афсуски, қарздорлик бартараф этилмаганлиги учун жамиятга тегишли бўлган юк машинаси 250 миллион сўмга баҳоланиб аукцион савдоларига чиқарилиши керак бўлган вақтда жамият раҳбари юк машинасини қасддан яшириб аукцион савдоларига чиқаришга тўсқинлик қилганлиги учун бюронинг вилоят бошқармаси томонидан Ўзбекистон Республикаси Жиноят кодексининг 233-моддаси билан жиноят иши қўзғатилиб, дастлабки тергов ҳаракатларини ташкиллаштириш учун вилоят прокуратурасига юборилди.

Норқувват Нурманов,

МИБ Сурхондарё вилоят бошқармаси катта суриштирувчиси