Ўтган дам олиш кунлари Тошкент бадиий гимнастика бўйича Жаҳон кубоги мусобақасига мезбонлик қилган бўлса, айни шу кунларда пойтахтимиздаги «Ўзбекистон» спорт мажмуасида оғир атлетика бўйича катталар ўртасидаги Осиё чемпионати бўлиб ўтмоқда.

25-26 апрель кунлари Тошкент яна бир нуфузли мусобақани қабул қилади. Шу кунлари пойтахтимизда қиличбозлик бўйича Токио-2020 Олимпиадасига йўлланма берувчи Осиё-Океания минтақаси саралаш турнири ўтказилади.

Маълумотларга кўра, Осиё-Океания минтақаси саралаш турнири учун 27та давлат спортчилари рўйхатдан ўтишган. Олимпия ўйинлари йўлланмаси эса фақат мусобақа ғолибларига тақдим этилади.

Мусобақада ҳар бир мамлакатдан атиги бир нафар спортчи қиличбозликнинг у ёки бу йўналишида иштирок этиши мумкин.

Янги Ўзбекистонга Янги ғалабалар ярашади. Шундай экан, Олимпия лицензиялари учун курашда қиличбозларимизга ёрқин ғалабалар ёр бўлишини тилаймиз!