Португалия, Жанубий Корея ва Бирлашган Араб Амирликлари миллий терма жамоларининг собиқ бош мураббийи Пауло Бенту Ўзбекистон МТЖга бош мураббий бўлиши мумкин. Бу ҳақда “Фоотбалл-Асеан” хабар берди.
Ўзбекистон футбол ассоциацияси (ЎФА) мамлакат тарихида илк бор 2026 йилги ФИФА Жаҳон чемпионатида қатнашиш йўлида жамоани бошқаришга муносиб тажрибага эга мутахассисни изламоқда. Уларнинг дастлабки уриниши 2014 йилги Жаҳон чемпиони Ёахим Лёв билан боғлиқ эди, аммо германиялик мураббий жиддий таклифларга қарамай, рад жавобини берди. Туркиянинг собиқ тажрибали мураббийи Фотиҳ Терим билан ҳам суҳбатлар бўлиб ўтгани ҳақида хабарлар тарқалди, бироқ ҳозирча у билан ҳам жиддий келишув йўқ.
Нашрнинг ёзишича, энди эътибор 56 ёшли португалиялик Бенту томон бурилган. Бенту мураббийлик фаолиятини Лиссабоннинг “Спортинг”ида бошлаган, кейинчалик Бразилиянинг “Крузейро”, Грециянинг “Олимпиакос” ва Хитойнинг “Чунсин Лифан” клубларини бошқарган.
Шунингдек, у 2010-2014 йилларда Португалия терма жамоасини бошқарган, Евро-2012 мусобақасида уларни ярим финалга олиб чиққан. Кейинроқ эса 2022 йилги Қатардаги Жаҳон чемпионатида Жанубий Кореяни 1/8 финалга олиб чиқиб, Осиёда катта эътибор қозонган. Бундан ташқари, сўнгги йилларда у Бирлашган Араб Амирликлари терма жамоасини бошқарди.
Ўзбекистон эса 2025 йилда илк бор АҚШ, Канада ва Мексикада ўтадиган Жаҳон чемпионатида иштирок этиш ҳуқуқини қўлга киритди. ЎФА жамоага йирик турнирларда тажрибага эга ва дунё саҳнасида рақобатбардош, тактик маҳоратли мураббий олиб келишни истамоқда.
Манбаларга кўра, Бенту билан музокаралар давом этмоқда ва португалиялик мураббий асосий номзодлардан бири сифатида қаралмоқда.
