2020 йил 4 июнь санасида Олтинсой тумани «Жобу-1″маҳалласида яшовчи фуқаро Қобилова Мавжуда туман шошилинч тиббий ёрдам бўлимига беҳуш ҳолда олиб келинган. Унинг айтишича, арзимаган маиший маҳсулот учун болалар ўртасидаги баҳслашувдан келиб чиққан жанжалда, у аввалбошда қайнукаси Б.Р. томонидан калтакланган бўлса, сал ўтиб, бу жараёнга эри Б.С. ҳам қўшилган. Шу тариқа, аёл қўлида ҳали энди бир ёшга кирган боласи борлигига қарамасдан ака-ука муштумзўрлар томонидан ўзини танимайдиган, беҳуш ҳолатга келтирилади. Икки «эркак» ожизанинг бош чаноқ қисми, орқа кўкрак, орқа мия, шунингдек, деярли тананинг ҳамма қисмига қўл билан уриб, оёқ билан тепиб, сочидан тортиб жароҳатлангани дастлабки тиббий текширувларда аниқланган. «Келин шифохонага келтирилганда беҳуш эди, ўзим олиб келдим», дейди маҳалла раиси Қобилов Мадиёр. Эътиборни тортадиган яна бир жиҳат шундаки, воқеадан 3 суткадан ошиқ вақт ўтган бўлса-да, қилғиликни қилганлар ҳануз «тараллабедод» юришибди. Diyor24 ходимлари ҳолатни ўрганиш учун жабрланувчи ётқизилган Олтинсой туман Тиббиёт бирлашмаси Шошилинч тез ёрдам бўлимига борди ва жабрланувчи, унга қаровчи шифокорлар, маҳалла раиси билан боғланди. Аммо, маҳалланинг профилактика инспектори билан боғланолмади. К.М. нинг онаси Холиқова Ашургул ва шифокор Санжар Носировларнинг айтишича, инспектор шу вақтга қадар  атиги бир марта келган. Шу келгани билан бошқа шифохонага оёқ босмаган. Ҳолат бўйича, Сурхондарё вилоят ИИБдан муносабат кутиб қоламиз.