Остона шаҳрида Қозоғистон ва Ўзбекистон ўртасида сайёҳлик поездлари қатнови тўғрисида битим имзоланди.
Қозоғистоннинг «Inbusiness» ахборот агентлиги берган маълумотга кўра, «Ўзбекистон темир йўллари» АЖ ва Қозоғистоннинг «Пассажирские перевозки» АЖ компаниялари раҳбарлари ўртасидаги учрашувда томонлар икки мамлакат ўртасида йўловчи ташиш соҳасида ўзаро ҳамкорлик алоқаларини ривожлантириш масалаларини муҳокама қилинган.
Қайд этилишича, икки давлат ўртасида сайёҳлик поездлари қатнови тўғрисида битим имзоланган, шунингдек, қўшма лойиҳаларни амалга ошириш бўйича ишчи гуруҳ таркиби тасдиқланган. Бу йўналишдаги илк қадамлардан бири «Жибек жўли» сайёҳлик поездининг ишга туширилиши бўлди.
«Шунингдек, бошқа йўналишларда ҳам шунга ўхшаш туристик маршрутлар йўлга қўйиш имкониятини кўриб чиқишга қарор қилинди. Хусусан, янги «Остона-Самарқанд» халқаро йўналиши кўриб чиқилмоқда», – деб ёзади «Inbusiness».
Қолаверса, ташриф давомида йўловчи ташишни бошқариш, ҳаракатланувчи таркибга техник хизмат кўрсатиш, ахборот тизимларини жорий этиш ва чипталарни онлайн сотишни ташкил этиш бўйича тажриба алмашиш масалалари ҳам муҳокама қилинган.
